Parsva Uttanasana.

Side Forward Fold Pose.

நாம் நலமுடன் வாழவேண்டுமெனில், ஆரோக்கியமாக திகழ வேண்டுமெனில் உடலுக்கு வெறும் உணவு மட்டும் இருந்தால் போதாது உடலுக்கு முறையான பராமரிப்பும், உடற்பயிற்சியும் மிகமிக அவசியம்.

அவ்வாறான உடற்பயிற்சியானது உடலுக்கு மட்டுமல்ல மனதிற்கும்கூட ஆரோக்கியத்தையும், புத்துணர்ச்சியையும் தருவதாக இருத்தல் வேண்டும்.

இதை கருத்தில்கொண்டே நம் முன்னோர்கள் உடலுக்கும், மனதிற்கும் பயிற்சி தரக்கூடிய "யோகாசனம்" என்னும் அற்புத வழிமுறையை நமக்கு வகுத்துத் தந்துள்ளனர்.

பொதுவாக நூற்றுக்கும் மேற்பட்ட ஆசனங்கள் உள்ளன என்றாலும் இவற்றில் பயிற்சி செய்வதற்கு கடினமாக உள்ள ஆசனங்களும் நிறையவே உள்ளன. பருமனான உடலை கொண்டவர்களால் சில கடினமான குறிப்பாக உடலை வளைத்து செய்யக்கூடிய ஆசனங்களை செய்ய முடிவதில்லை. அப்படியானவர்கள் பயிற்சி செய்வதற்கு எளிமையான சில ஆசனங்களை தேர்ந்தெடுத்து பயிற்சியில் ஈடுபடலாம்.

அதை விடுத்து கடினமான ஆசனங்களை செய்ய முற்பட்டால் உடலில் பல விரும்பத்தகாத பிரச்சனைகள் ஏற்படலாம்.

எனவே, தொடர்ந்து சில மாதங்கள் எளிதான ஆசனங்களை செய்து உடல் நன்கு துவளும் தன்மையை பெற்றபின்பு கடினமான ஆசனங்களை செய்ய முற்படலாம்.

அவ்வாறு பயிற்சி செய்வதற்கு எளிமையான ஒரு ஆசனத்தைப் பற்றிதான் இப்பதிவில் நாம் பார்க்க இருக்கின்றோம். வாருங்கள் பார்க்கலாம்.

பார்ஸ்வ உத்தனாசனம்.

Single Leg Forward Bend.

பெயர் :- பார்ஸ்வ உத்தனாசனம்.

தமிழில் :- பார்சவ உத்தனாசனம்.

சமஸ்கிருதம் :- Parsva Uttanasana.

ஆங்கிலம் :- Side Forward Fold Pose.

வேறுபெயர்கள் :- Parsvottanasana, Parsvattanasana, Pyramid Pose, Single Leg Forward Bend, Side Forward Fold Pose.

"உத்தனாசனம்" என்னும் பயிற்சியை பற்றி ஏற்கனவே நாம் பார்த்துள்ளோம். உத்தனாசனம் என்பது நேராக நின்று கொண்டு உடலை முன்னோக்கி வளைப்பதைக் குறிக்கும்.

உத்தனாசனத்தைப்போல இப்பயிற்சியிலும் உடல் முன்னோக்கிதான் வளைக்கப்படுகிறது என்றாலும் அப்பயிற்சியிலிருந்து இது சிறிய அளவிலான மாற்றத்தைக்கொண்டுள்ளது.

இரு கால்களையும் சேர்த்து வைப்பதற்கு பதிலாக இரண்டடி முன்னும் பின்னுமாக வைத்தபடி உடலை முன்னோக்கி வளைப்பதால் இது "பார்ஸ்வ உத்தனாசனம்" என பெயர்பெறுகிறது. இதனை ஆங்கிலத்தில் "Intense Side Stretch Pose" என குறிப்பிடுகின்றனர். இதன் வடிவத்தை பொறுத்து இதனை ''பிரமிடு போஸ்'' எனவும் அழைக்கின்றனர்.

பார்ஸ்வ உத்தனாசனம்.

செய்முறை :- முதலில் ஒரு கெட்டியான விரிப்பின்மேல் இரு கால்களையும் சேர்த்து வைத்தபடி நேராக நிற்கவும்.

பின் வலதுகாலை இடது காலில் இருந்து ஒரு இரண்டடி தூரம் இருக்கும்படி முன்னோக்கி நகர்த்தி வைக்கவும்.

இரண்டு கைகளையும் முதுகுக்குப் பின்னால் கொண்டுசென்று முழங்கைகளை மடக்கி கட்டிக்கொள்ளலாம் அல்லது இரு உள்ளங்கைகளையும் குவித்து கும்பிடுவதுபோல முதுகின் பின்னால் வைத்துக்கொள்ளலாம்.

அதன்பின் மெதுவாக இடுப்பை முன்னோக்கி வளைத்து வலது முழங்காலில் உங்கள் முகம் படும்படி 30 வினாடி நிற்கவும்.

பின் மெதுவாக நிமிர்ந்து கால்களை மாற்றி பயிற்சி செய்யவும்.

அதாவது வலது காலுக்கு பதிலாக இடதுகாலை முன்னோக்கி நகர்த்திவைத்து இரண்டு கைகளையும் முதுகிற்கு பின்னால் கொண்டுசென்று முழங்கைகளைக் கட்டிக்கொண்டோ அல்லது இரு உள்ளங்கைகளையும் குவித்து கும்பிடுவதுபோல வைத்துக்கொண்டோ முன்போல மெதுவாக இடுப்பை முன்னோக்கி வளைத்து இடது முழங்காலில் உங்கள் முகம் படும்படி 30 வினாடி இருக்கவும்.

இவ்வாறு இரு கால்களையும் மாற்றி மாற்றி 3 முதல் 5 தடவை பயிற்சி செய்யவும்.

பலன்கள் :- வயிறு, முதுகு, இடுப்பு சம்பந்தப்பட்ட நோய்களை நீக்குவதோடு அவைகளுக்கு வலிவையும் தருகின்றன. மேலும் நரம்புகளுக்கு புத்துணர்வூட்டி மூளையை சுறுசுறுப்பாக்குகின்றன. கழுத்து, தோள்பட்டை, முழங்கை, கால் முதலிய உறுப்புகளுக்கு வலிமை தருவதோடு பெண்களுக்கு மாதவிடாய் பிரச்சனைகளையும் களைகின்றன.